维拉足总盃决赛斗阿仙奴

2:1粉碎谢四生日捧盃梦

维拉粉碎谢拉特生日捧盃梦！寻晚英总4强战，维拉凭宾迪基及戴尔夫各建一功，以2:1反胜利物浦，将会喺5月30号同阿仙奴决战温布莱。季尾离队嘅谢拉特，始终未能捧盃完美告别。

今届英总决赛举行日子撞正谢拉特35岁生日，「红军」上下都好想捧盃，等「神奇队长」完美告别。利物浦本应有个好开始，上半场30分钟，菲腊比古天奴先开纪录，可惜之后状态大勇嘅维拉射手宾迪基射入近6仗第8球，为维拉追成1:1完半场。换边后踢到55分钟，维拉件英格兰国脚戴尔夫射成2:1，之后「红军」积极反扑，可惜有心无力，维拉保持胜果杀入决赛，同阿仙奴争盃。

同晚，力保前4嘅曼城喺主场以2:0击败韦斯咸，今仗有士哥嘅阿古路亦升上射手榜一哥，可惜佢队友大衞施华食咗一肘晕低要抬离场，睇嚟伤势都几严重。

曼城两蛋赠韦斯咸

「蓝月亮」喺开赛初段劲有运，18分钟客军守将占士哥连斯解围挞Q摆老乌，益曼城先开纪录。及后阿古路再建一功，取得今季联赛第20球，力压车仔嘅迪亚高哥斯达同热刺红人哈利卡尼，升上射手榜榜首。换边后踢到67分钟，曼城中场大衞施华畀韦斯咸嘅高耶迪批肘击中面部晕倒，经过长达8分钟治理戴住氧气罩被抬离场，似乎伤势唔轻，随后两军再无交收，维持2:0战果到完场。

虽然曼城赢波，但比历连尼都唔好咁老定，据闻「蓝月亮」睇中前阿根廷主帅沙贝拉，沙帅亦强调曼城先係佢首选。